الموضوع ديالنا هو كيفية الشراء من موقع Ali-express والشراء عبر الإنترنت عموما.
اولا الدفع كيكون مسبق اي كتخلص و كتسنا السلعة توصلك. و باش تدير هاد العملية خاصك بطاقة شراء الكترونية عالمية Mastercard او Visa.
منين غنجيب هذ البطاقة ؟
خاص يكون عندك 18 لعام على الاقل باش تفتح حساب بنكي وتحصل علا بطاقة بنكية عالمية. كتمشي عند اي بنكة كتقوليهوم فتحو ليا حساب مع بطاقة بنكية عالمية راه كول بانكة عندها ديك البطاقة او ها هما سميات ديالهوم:
My E-C@rd – SGMB (Société Générale)
BMCE E-Pay
E-Shopping – CIH
I-C@rd – Banque Populaire Maroc (Bank Chaabi)
Pay Web – Attijariwafa Bank
كيفاش نعرف المواقع منين نشري؟
كاينين بزاف د المواقع بحال Aliexpress وBanggood وAmazon وEbay لمهم لمواقع لمشهورين بزاف او متشريوش من المواقع غير المشهورة ابدا.
كيفاش نقدر نشري من الموقع لي بغيت؟
كتدخل الموقع وكتحدد المنتوج او المنتوجات لي بغيتي او كتجمعهوم ف سلة كتمشي تخلص تدخل سمية او العنوان باش اوصلك حتا لدار او لبوسطة لي قريبة ليك الا كنتي ساكن فالبادية او معلومات البطاقة او تضغط علا ok كيوسلك مساج ف تلفون بلي راك شريتي .
واش أي حاجة شريتها غاتوصلني؟
كاينة قائمة الممنوعات فالمغرب اللي الا شريتيها غاتحبس فالديوانة وغاتقدر تجرك للمساءلة القانونية، بحال الأسلحة بجميع أنواعها، كما أنه من بين الممنوعات كانلقاو طائرة درون، والطابعة ثلاثية الأبعاد
شنو هوا الفرق بين البريد العادي المسجل، والشحن السريع؟
البريد العادي بحال مثلا البريد الصيني، البريد الهولندي، البريد السنغافوري، البريد البلجيكي.البريد الصيني. الخ. هادو غالبا كاتستغرق مدة التوصيل ديالهم بين 20 و 30 حتال 60 يوم أما شركات الشحن السريع كاينة DHL وARAMEX وFEDX وغيرهم من شركات الشحن السريع الاخرى لي مدة التوصيل ديالهم كاتستغرق أسبوع أو2 تقريبا أوأقل، لكن كاتكون تكلفة الشحن مرتفعة.
كيفاش نعرف الكولية ديالي فين وصلات؟
ملي كاتشري من أي موقع معين، كيعطيوك واحد الكود كيتسما Tracking Number كتدخل لسيت او تطبيق ديال 17Track وكاتدخل فيه داك الطراك وكل مرة كاتعرف فين وصلات الطلبية ديالك. حاول دائما فوسيلة الشحن تختار البريد المسجل.
شنو المبلغ لي ماعنديش الحق نفوتو فالعام ؟
فالمغرب بخصوص الشراء من المواقع العالمية المبلغ المحدد هو مليون ونص سنتيم - 15.000 درهم ,الا بغيتي تشري كتر من داك القدر تقدر تفتح حسابات بنكية لخوتك ولا والديك فسمياتهم على أساس باش تستغلها نتا، وتقدر كذلك تتسجل فالبايبال وبقا تشري الصولد لي غاتشري بيه
تعليقات
إرسال تعليق