 |
كيفاش نحمي حسابي البنكي من الاختراق و يبقا بالي مرتاح؟
الطريقة الأساسية باش كيتم سحب الأموال بدون الموافقة أو العلم ديالي هي عن طريق البطاقة البنكية اللي فاش كناخدها من عند البنك كنولي أنا المسؤول الأول عليها. و فهدا الإطار غادي نكتاشفو الخطوات اللي خاص نتبعها بحرص باش نخلي فلوسي فأمان
⚠️ 1- فاش كناخد بطاقة السحب كيعطيوني معاها كود Pin فبرا enveloppe ولا ب sms ، من الأحسن نعقل عليه مزيان و نمحيه فخطرة (نقدر نقيدو فالهاتف ديالي بصفة متنكرة فشي بلاصة بحال contacts) ولا نبدلو فگيشي اللي تابع للبنك ديالي
⚠️ 2- ما نحطش الكود Pin و البطاقة فبلاصة وحدة بحال فالبزطام، و هاد القضية كيديروها بزاف الناس الكبار باش تا يتفكروه و هوما حدا الگيشي، و فاش كيطيح ليهم ولا كيتشفر البزطام، و كيولي داك اللي خداه عندو طريق مسرحة للحساب
⚠️ 3- يلا عندي بطاقة فيها خدمة الأداء بدون تماس Contactless (أي نخلص فشي محل بلا ما ندير الكود) و كنعرفها من الرمز ديال "الويفي" ((( فالواجهة ديالها، و كنت ما كنخلصش بيها بزاف،ف (على حساب البنك اللي عندي) نديزاكتيڤي هاد الخدمة أو نديزاكتيڤي الأداء بالبطاقة، أو على الأقل ديما نخليها معايا و نرد ليها البال
⚠️ 4- عند الأداء بالبطاقة، ما نعطيهاش لداك اللي غادي يتخلص من عندي (كتوقع بزاف مثلا فمحطة الوقود ) يديها و يدخلها فجهاز الأداء Tpe و عاد يجي يعطيني ندير الكود و لا يكون الجهاز بعيد و يطلب مني البطاقة و الكود ديالها
🔵 الشراء الإلكتروني
⚠️ 5- كيف تنعرفو المعلومات باش ندير عملية فموقع الكتروني ، كاينين كاملين فالبطاقة، لذلك ينصح أنني نمسح داك كود ديال 3 أرقام المعروف ب cvv أو Cryptogramme، و نعقل عليه مزيان أو نقيدو عندي فالهاتف بصفة متنكرة
⚠️ 6- نديزاكتيڤي خدمة الأداء الإلكتروني من التطبيق البنكي ديالي حتا نبغي نشري عاد نأكتيڤيه
⚠️ 7- نتفادى تسجيل البطاقة فالمواقع الإلكترونية خصوصا التطبيقات الهاتفية ، هي صحيح كتسهل عليك الأداء و لكن يلا خدا ليك شي واحد الهاتف راه تيولي عندو الباب مفتوح باش يشري بفلوسك (كتوقع بزاف للأباء مع الأبناء ديالهم من خلال Google Play و كيصدقو فلوسهم مخسورين فمجوهرات Free Fire)
⚠️ 8- نرد البال مع العروض المغرية أو العروض التجريبية ديال شي خدمة و اللي هي فالحقيقة اشتراك غير ديك المدة التجريبية فابور، تيقول ليك جرب بالمجان مقابل تدخل معلومات البطاقة، و لكن غير كتسالي ديك المدة را تيبداو يقطعو ليك ثمن الاشتراك. يعني خاص تمحي البطاقة من داك الموقع مباشرة بعد الاستفادة من العرض.
⚠️ 9- نربط البطاقة الدولية ديالي مع خدمة PayPal، و وقت ما كان إمكانية نفضلو 1⃣ هو كطريقة للأداء بحيث ما كندخلش معلومات البطاقة ديالي فالموقع، أو نخصص الأداء الإلكتروني فالمواقع الأجنبية (يلا كنتعامل بيه بزاف) للبطاقة اللي كتشارجا و مفصولة على الحساب ديالي
⚠️ 10- قبل ما ندخل المعلومات ديال البطاقة البنكية فشي موقع، خصوصا اللي ما معروفش، نقلب عليه واش موثوق ولا لا ✔️، و نشوف واش فيه خدمة ديال 3d secure (أي أن العملية ما تدوز حتا يجيني كود من البنك لتأكيد العملية و اللي بالمناسبة ما كتأكتيڤاش من البنك، و لكن كيخص الموقع يكون دايرها) و كنعرفو ب logo فيه Mastercard Secure Code أو Verified By Visa سوا فالصفحة الأولى ديالو أو فصفحة الأداء.
كيف ما كان الحال البطاقة البنكية خاص نحافظ عليها و ما نعطي المعلومات ديالها لتا واحد. و فحالة ضاعت مني لأي سبب، ندخل فالحين نديزاكتيڤيها من التطبيق البنكي ديالي.
شارك المقال مع صحابك و فمجموعات ديال الشوپ باش الناس يردو بالهم و يحافظو على فلوسهم فأمان.
تعليقات
إرسال تعليق